Australia ba hu ka espia PM Kay Rala Xanana Gusmao,tamba saida?

Dili,Thm(04/06/2010). Australia ninia diplomacia preokupadu duni ho deklarasaun PM Kay Rala Xanana Gusmao nian ne’ebe durante halao konsultasaun ba PEDN iha sub-distritus hotu-hotu konaba Australia/Woodside nebe hakarak nauk Timor-Leste ninia riko no soin. Iha PM Kay Rala Xanana Gusmao,sempre koalia bebeik iha sub-distritus sira ne’ebe maka ba halo Konsultasaun konaba PEDN.
Tuir Tempo Semanal,iha ninia edisaun (01/06/2010) informa konaba “Iha surumutuk hodi sosializa ba PEDN iha Sub-distritu Manatuto, loron quarta-feira (26/05), tuir observasaun Journal ne’e nian,ajentes husi Australia nian subar an iha komunidade nia let hodi akompana saida maka PM Kay Rala Xanana Gusmao hatou ba komunidade, no saida maka Kay Rala Xanana Gusmao menciona konaba Australia no Woodside. Kareta ne’ebe maka ajentes servisus intilijencia uja maka ho matrikula 032.9 CD. Kareta ne’e para hela iha kampu Futebol besik rii baliza nian parte tasi ibun nian(TS,01/06/2010,hal.1 no 16)”.

Tuir Roy Martins,dosentes husi UNDIL katak,”Australia preokupado bot ho deklarasaun PM Kay Rala Xanana Gusmao nian,tamba lian hirak ne’e kasu ba povu iha baze,natural ke Australia preokupa duni”. Haktuir tan,” oras ne’e dadaun hamosu fali konsciencia nasional Timor oan hotu nian,oinsa maka bele hamutuk hodi hasoru imposisaun ba interese husi liur”,defende Roy Martins.

Ba Alberto Reis Maklear,husi UNPAZ,konaba kasu,kareta diplomata Australia ba espia PM,ne’e hatudu katak “Australia preokupado tebes tamba Australia ninia Politika estrategika Timor-Leste sai hanesan parte husi geografia rejional iha dominu politika,ekonomika no geoestratgika Australia nian,neduni se iha Timor-Leste maka iha politika no estratejia nebe maka kontraria orientasaun Camberra nian,bele konstitui ameasa ba Australia”. Ba Alberto Reis Maklear,”alerta mos katak,ultimu konsekuencia maka Australia buka oinsa maka kria instabilidade no troka lideransa ka governu ne’ebe maka la favorece ba sira nia governu”,defende Reis Maklear.

Tuir Nando Belo,xefi departemento Relasaun Externa NGO Tur Hamutuk,”Australia ninia presensa iha konsulta PEDN foin dadaun iha Manatuto (26/05/2010) ne’e iha duni motivu ba espia ka hu PM Kay Rala Xanana Gusmao,tamba tuir lolos ba Kareta CD tenke fo hatene,ami hakarak asiste rona konsultasaun PEDN ne’ebe hatou husi PM Kay Rala Xanana Gusmao.Maibe problema maka sira ba nonok deit,klaru ke iha intensaun ruma”. Dehan Nando Belo,”intensaun bele diak mos bele ladiak,neduni alerta katak rai bot sira,bele halo buat hotu hodi ba atinji sira nia objektivu”,defende Nando Belo,xefi Departemento Relasaun Externa NGO Tur Hamutuk!