segunda-feira, 29 de março de 2010

PPR neé kontribui ba descentralizasaun desenvolvimentu Nasional

Dada lia ho Direktur NGO Tur Hamutuk

PPR neé kontribui ba descentralizasaun desenvolvimentu Nasional

Wainhira mosu PPR (Projektu Pakote Referendum) iha pro no kontra, balun dehan legal no balun fali dehan ilegal tamba la previstu iha OGE2009. Ba argumentu legalargumenta katak ne´e transferencia husi OGE2009 neé Parlamentu Nasional (PN) aprova hodi aloka ba infra-estrutura.

Mos ninia impaktu neébe husi 800 ho resin bele dehan katak maioria ka barak maka sucesu, laos signifika katak la iha problema,maibe ninia impaktu ba desentralizasaun ba desenvolvimentu no liliu ba aprovisionamentu.

Tuir mai Media Tur Hamutuk (MTH) dada lia ho Direktor Exekutivu NGO Tur Hamutuk,Rui Costa (RC) konaba PPR.

Media TH (MTH): Oinsa NGO Tur Hamutuk nia hare ba Projektu Pakote Referendum (PPR) ne´ebe IV Governu Konstitucional implementa?

Rui Costa (RC): Diak,PPR ne´e medidas ne´ebe maka Governu AMP liu husi PM Kay Rala Xanana Gusmão foti ho objektivu klaru no diak,oinsa maka hasae kbiit ita ninia empresarius nasionais ninia kapacidade,oinsa maka sira bele sai hanesan parceiru ba desenvolvimentu estadu nian. Husi sorin seluk,oinsa maka descentraliza ba desenvolvimentu,tamba ne´e maka PPR fó ba empresarius husi distritus ida-idak maka kaer no koordena.

MTH: Tuir NGO Tur Hamutuk nia hanoin no hare,intensaun saida husi Iv Governu Konstucional hodi hamosu PPR?

RC: Objektivu hamosu ne´e tamba hare ba necesidades desenvolvimentu povu nian,husi sorin ida.Husi sorin seluk, oinsa maka halo transferencia husi OGE2009 nian ne´ebe aloka ba infra-estruturas.Oinsa maka hasae osan husi ba facilita infra-estruturas basikas ba sektores sira hanesan edukasaun,saude,no seluk tan. Naran referendum hodi fo hanesan homenajen ba komemorasaun ba 10º aniversario referendum,dala ruma ba tinan ida ne´e bele hamosu tan naran Pakote ba Desenvolvimentu (PD).

MTH: Maibe razaun husi Governu katak ato hasae kbiit no kapacitasaun emprezariu nasional sira no hamoris ekonomia povu kiik sira areas rurais?

RC: Tuir ami husi Tur Hamutuk nia hare husi parte positivu ba PPR nian maka ne´eduni oinsa maka hasae kbiit ba empresaius lokais no hasae ekonomia ita nia povu nian. Maske seidauk suficiente,tamba la iha medidas ida ne´ebe maka implmenta perfeitu,buka perfeitu ne´e so iha Lalehan deit,iha rai nia leten la iha buat ida maka perfeitu.Dehan nune atu rekonece katak PPR laos satisfas ema hotu,maibe maioria bele dehan sim, tamba abranje ba ema hotu,grupus hotu,kores partidus politikus hotu-hotu.

MTH: Oinsa NGO Tur Hamutuk nia hare ba deklarasaun Governu katak implementasaun PPR ne´e sucesu?

RC: Governu iha razaun atu deklara katak iha duni sucesu ba implementasaun husi PPR ne´e,tamba hare husi ninia exekusaun fisika ba PPR. Maske kompanias balun la kumpri,ne´e tama ona ba black list,neduni iha futuro la hetan ona PD ka pakote sira seluk.

MTH: Governu atu aprova pakote foun ida hodi fo naran Pakote Desenvolvimentu(PD), sei fo deit osan ba $25 ba karaik, ba kompanias lokais sira,tuir ita nia hare oinsa?

RC: Hanoin diak,ne´ebe hatudu esperiencia PPR nian,ida tan Governu hetan ona ninia parceiru husi AECOP husi distritus ida-idak ho kriterius kompanias sira tenke rejista ho kartaun eleitoral no alamat kompanias iha distritu ida-idak. Ne´e diak,maske buka hadia iha buat barak,hanesan parte administrasaun,jestaun no finanças ba AECOP.Neduni nudar sociedade Civil buka hasae tan kbiit ita ninia empresarius nasionais no distritaus nian iha parte faktores sira neé hotu.


MTH: Oinsa ita nia hare ba kestaun husi publiku,inklui membru Parlamentu Nasional balun (liliu OMP),konaba relatoriu PPR ne´ebe Governu ho AECOP seidauk hatou ba PN?

RC: Relatoriu ba PPR ne´e prazu ne´ebe maka ami hatene maka loron 31.03.2010, neduni preokupasaun husi NGO balun no membru parlamentar balun neé normal.Hola parte ba dinamika iha ita nia sociedade, hatudu katak laos sociedade ida neébe maka statis mais sempre dinamika.
Buka enkara ba kritikas sira neé hanesan motivu ba hadia procesu desenvolvimentu nasaun ida neé nian.

Maibe avaliasaun neébe objektiva laos subjektiva hanesan NGO balun neébe luta ba ajenda partidus politikus no ajenda titilan husi liur dehan PPR neé gasta osan deit. Objektivamente PPR neé medidas foun ida,ninia sucesu neé bot. Ninia impaktu ba dinamika ekonomia lokal neé bot tebes. Maske laos satisfas ba ema hotu,tamba la iha medida ida maka perfeitu iha rai nia leten!

sexta-feira, 19 de março de 2010

konflitus interese ho relatoriu KI---Relatoriu KI ka Relatoriu AB?

Arsenio Bano ne'e membru Komisaun Inqueritu (Ki), tamba saida maka seidauk anunciu ninia resultadu oficial,maibe Arsenio Bano mai halo ona probaganda konaba resultadu KI?Duvida seluk, maka tempu ba KI ninia servisu nudar rejimentu PN hatudu,husi dia 17 setembru to'o agora 17 marsu,total:quase 180 dias,signifika katak ultrapassa ona tempu nebe maka Rejimentu PN estabelece ba KI hahu simu mandatu ho hakotu mandatu hamutuk loron 90 deit.Signifika ke,tempu limite ba entrega relatoriu KI iha loron 17 fulan Dezembru.Maibe relatoriu KI hatama iha loron 9 fulan Marsu,signifika ke la tuir ona norma rejimentu hakerek konaba mandate no durasaun tempu ba KI ninia halao knar. Relatoriu pessoal ka KI?Tuir membrus KI sira seluk,katak Arsenio Bano nunka konvoka enkontru KI I nunka halo relatiriu KI nian,tuir Rejimentu PN KI ne’e servisu equipa ida. Tamba la konvoka KI ba halo servisu no relatoriu,ikus Arsenio Bano halo relatoriu individual.Viola ona rejimentu PN konaba KI no halo relatoriu mesak tuir intensaun no interese rasik.Mosu konflitus interese.Tamba iha konflitus interese husi membrus KI liliu Prezidente KI Arsenio Bano, Jose Teixeira,tamba sira rua durante ne’e, sai hanesan links ba media konaba fos,oinsa maka sira bele hatudu sira nia independencia wainhira servisu iha KI?Kasu membrus KI hanesan Arsenio Bano i Jose Teixeira,nudar links ba media konaba korupsaun iha fos,enquantu sira ba tur iha KI mosu konflitu interese,tamba sira la hatudu independencia ona ba sira halao ninia servisu tamba ba impoen interese sira nia grupus nian. Ikus mai servisu KI sai fali relatoriu pesoal ida!

segunda-feira, 15 de março de 2010

Se Mari Alkatiri maka PM no Jose Teixeira maka SERN,oras ne’e kadoras GSR dada ona ba Australia karik?

Se Mari Alkatiri maka PM no Jose Teixeira maka SERN,oras ne’e kadoras GSR dada ona ba Australia karik?

Hau nia beneficiu duvida maka ne’e: Se Mari Alkatiri maka PM oras ne’e dadaun,Jose Teixeira maka SERN oras ne’e dadaun,saida maka akontece ho Negociasaun ba Tasi Timor?

Hare husi historia negociasaun Bayu Undan nian,wainhira Mari Alkatiri hahu negociasaun,hatudu katak ema ida ke konsisten no koerente,maibe de faktu Mari Alkatiri Mamar wainhira to’o oras ba assinatura.

Molok Mari Alkatiri cefia delegasaun Timor-Leste ba halo asinatura akordo ho Australia,sai husi Timor-Leste hakilar katak sei lori kadoras Bayu Undan mai Timor-Leste. Afinal to’o asina akordu,nem menciona netik iha text konaba dada kadoras GSR mai Timor-Leste. Neduni duvida maka ne’e: Mari Alkatiri ho Jose Teixeira maka oras ne’e lidera negociasaun tasi Timor,kala oras ne’e kadoras GSR dada ona ba Australia.
Hare deit komunikadu Fretilin iha fulan Outubro tinan 2008 katak “Timor-Leste la iha viabilidade tekniku-cientifiku no ekonomika hodi dada kadoras GSR mai Timor-Leste (hare Komunikadu Fretilin Media,Outubro 2008)”.

sexta-feira, 12 de março de 2010

Tur Hamutuk suporta Governu ninia posisaun konaba Tasi Timor

Dili. Nudar organizasaun sociedade civil hanesan parceiru desenvolvimentu estadu nian buka sai parceiru ba estadu iha aspektus houtu-hotu,kasu lia hirak ne´e husi direktur exekutivu NGO Tur Hamutuk, Rui Costa ba Media Tur Hamutuk (MTH) iha ninia knar fatin,Av.Presidente Nicolau Lobato Nº.7, Dili,sexta-feira (12/03).

Haktuir tan Rui Costa,”Tasi Timor ne´e interese nasional,neduni komponente hotu-hotu iha rai ida ne´e buka atu hamutuk hodi defende interese nasional no hamutuk ita hasoru imposisaun mai husi liur konaba ita nia riku no soin”.

Tenik tan Rui Costa,” nudar NGO nasional,ne´ebe iha personalidade jurídica RDTL nian buka defende interese nasaun RDTL,laos ba joga fali rai seluk ninia interesse no laos joga fali ajenda rai seluk nian”, defende Rui Costa.

Tur Hamutuk nudar organzasaun sociedade civil suporta posisaun Governu nian konaba Tasi Timor,liliu komitmente ne´ebe maka IV Governu Konstitucional lidera husi PM Kay Rala Xanana Gusmão hodi dada kadoras Greater Sunrise (GSR) mai Timor-Leste.

Haktuir Rui Costa,”Governu liu husi SERN (Secretario Estado Recursos Naturais),ANP (Autoridade Nacional Petróleo) no Task Force Tasi Timor hatudu duni sira ninia kompetencia ba defende interesse nasional hodi dada kadoras GSR mai Timor-Leste”. Hatutan,” Governu halo ona estudus hamutuk ho kompanias hanesan Petronas husi Malaysia no KOGAZ husi Koreia Selatan konaba estudo viabilidade ekonomika,tekniku-cientifika,resultadu hatudu katak iha duni viabilidade hodi dada kadoras GSR mai Timor-Leste”, dehan Rui Costa.

Derektur Exekutivu NGO Tur Hamutuk, “mos aproveita biban ne´e lansa mos kritika ba NGO balun ne´ebe defende fali interesse Australia ho Woodside nian konaba Tasi Timor. Nudar organizasaun sociedade civil, ita buka suporta estadu no laos buka infrakese estadu hodi defende fali interesse rai seluk nian”,defende Rui Costa.

IV Governu Konstitucional lidera husi PM Kay Rala Xanana Gusmão, hatudu ona komitmente hodi dada kadoras GSR mai Timor-Leste. Se opsaun ida ne´e maka Australia no Woodside la simu,husi Timor-Leste lakohi bok tan,husi deit ba aban bai rua maka sei explora. Husi parte Australia lakohi, tamba se la dada kadoras GSR ba Australia,opsaun seluk maka husik iha Tasi Leten,harii Floating LNG iha tasi leten deit.

Ba Timor-Leste iha duni viabilidade ekonomia no tekniku-cientifiku dada kadoras GSR mai Timor-Leste. Ho ida ne´e bele desenvolve Timor-Leste socio-ekonomiku no lori progressu ba ita nia rain no povu!

terça-feira, 9 de março de 2010

Breaking News: Woodside fo tan opsaun ida ba Timor-Leste

Timor-Leste: Ne'e manobra Australia ho Woodside nian deit

Dili. Woodside fo opsaun 2 ba Timor-Leste,dada Pipeline Greater Sunrise ba Darwin, Australia.Se Timor-Leste la simu opsaun ida ne'e, fo fali opsaun seluk,husik iha Tasi Leten. Informasaun ne’e hetan husi Media Tur Hamutuk (MTH) wainhira hola parte iha surumutuk ne’ebe maka representante Woodside iha Timor-Leste Brendam halo ho Luta Hamutuk.
Hatan ba posisaun foun ida ne’e,husi parte Governu Timor-Leste konsidere katak,”ne’e hanesan jogo tatika husi Australia no Woodside para Timor-Leste bele muda ninia posisaun”. Hatutan source iha ne’e,”Australia hakarak harii Floating LNG iha tasi leten maibe ho teknolojia no infra-estruturas,rekursus umanus mai husi Australia no Timor-Leste sei la manan buat ida ho manobra Australia nian ne’e”,defende source iha Governu Timor-Leste nian ba MTH!

segunda-feira, 8 de março de 2010

PJR arquivu kasu fahe kilat tamba falta evidencia

Dili. Prokuradora Jeral Republika (PJR) Dra.Ana Pessoa,haktuir katak "razaun ba arquivu kasu fahe kilat iha krize 2006 tamba falta ba evidencia",kasu lia hirak ne'e liu husi konferencia imprensa iha ninia kna fatin,Kolmera,DIli (09/03).

Haktuir tan Ana Pessoa,"tamba la iah evidencia fortes maka arquiva kasu ne'e,se wainhira iha fali evidencia hafoin bele loke fila fali kasu ne'ebe maka arquivo tiha ona".

Tuir Deputada Fernanda Borges,husi Partidu PUN,iha ninia deklarasaun katak,"“Ami hanoin presiza loke fali investigasuan, tanba se ita haree ba kazu fahe kilat nee iha evidensia forti tuir relatoriu ONU katak komisaun Interitu Internasional (KII) presiza bolu ema sira nebe responsabel ba krize nee, tanba agora arguidu Frederico Florindo “Kiak” no Alberto da Costa hetan sentensa nudar vitima simu kilat nee,” Prezidente Komisaun A- PN Asuntu Konstitusional Justisa Administrasaun Publika Poder Lokal no Legislasaun Governu, Fernanda Borges ba STL iha salao Delta Nova Komoro Dili, Sigunda (8/3)".

Tenik tan Prezidente Komisaun A, "Fernanda Borges husu atu loke hikas kazu nee, hodi buka tuir kilat nebe Kiak sira hetan atraves saida hodi hamosu tiruteru iha akontesementu 27 Abril 2006 iha Merkadu Lama no rezulta membru PNTL nain 8 mate no kanek inklui padre militar ida.
Borges husu ba lider sira nebe fahe kilat ba ema sivil sira atu labele halai ses husi justisa, no tenke brani simu responsabilidade ba sira nia hahalok no labele fo kulpa ema seluk nebe sai vitima.
“Politiku nebe desidi konaba fahe kilat nee haruka F-FDTL intervene iha siguransa interna presiza atu responde iha tribuna,”.
Fernanda Borges hatutan, PJR bele iha razaun atu koalia kazu nee nudar segredu justisa, maibe presiza esplika tanba autor sira nebe simu kilat nudar vitima la simu desizaun tribunal.
“Se dehan, hanoin segredu justisa labele tau fali kulpa ba tranparensia ho justisa atu lao hanesan ba ema hotu iha rai laran,” nia hatete.

Tanba tuir Borges katak, se justisa la fo sai segredu demais bele fo impaktu ba justisa iha TL atu lao iha nakukun laran, no justisa so ba deit ema kiak, maibe ba politikus hanesan kurtina deit.
“Se justisa segredu demais fo kauza ba justisa atu lao ladiak iha rai Timor, ita presiza loke prosesu nee, e responsabiliza ema nebe fahe kilat, tanba arquido “Kiak” nebe implementa orden sai vitima,” Borges preokupa".

Investiga Membru Governu Gabineti Krize,Ana Pessoa membru

Prezidente Komisaun A-PN sublinha liutan katak, relatoriu KII no PDHJ nian hatudu momos katak krize 2006 presiza investiga mos membrus gabineti krize sira hanesan, Eis PM Mari Alkatiri, Eis PM Jose Ramos Horta Komandante F- FDTL, Major Jeneral Taur Matan Ruak.
“Tenki investiga mos gabineti krize nebe lidera husi Eis PM Alkatiri, Eis PM Jose Ramos Horta no membru gabineti krize hotu no estrutu hirarkia F- FDTL nebe involve iha fahe kilat ba Kiak sira,” nia sublinha.
Proseisu investigasuan ba kazu nee tenki investiga, tanba pres-peksaun povu Timor agora konsidera povu sira maka sai vitima no kauza husi krize, tanba to agora lider ida nunka responsabilidade ba krize nebe mosu.
Nee duni, nudar Deputadu PN, Borges tenki buka atu hatene informasuan nee, para hadia sistema justisa TL hodi povu komprende lei RDTL maka fo mahon no fo protesaun ba sidadaun hotu- hotu.
Iha fatin hanesan, Prokuradoria Jeral Republika (PJR), Dra Ana Pessoa Pinto informa katak, nia parte iha tempu besik prontu atu fo sai mutivu arquiva kazu fahe kilat nee.
“Hau sei esplika ba publiku hodi hatene prosesu kazu nee tanba saida maka arquiva,” dehan Ana ba jornalista hodi lakohi fo komentariu naruk.
Parte seluk, Direitor Judisial Sytem Program Monitorizasaun Sistema Justisa (JSMP), Luis Oliveira Sampaio hatete tuir lei PJR iha poder atu la fo sai ba arquiva kazu fahe kilat ba ema sivil. Maibe kazu hotu nebe KII fo sai sekuandu seidauk prosesa iha tribunal, PJR presiza esplika ba publiku hodi komprende para labele hamosu konfusaun.
“Se dehan segredu justisa dala ruma kria fali konflitu interese barak liu,” tenik Oliveira ba STL.
Luis Olivera hatutan, PN no publiku mos iha direitu atu buka hatene prosesu nee, maibe la signifika atu intervene ba prosesu kazu nee. Tanba importante liu maka tenki esplika ba publiku atu hatene.
Nia dehan, tuir lei kazu PJR bele arquiva kazu fahe kilat nee wainhira la iha evidensia forti atu lori prosesu nee ba oin. maibe se prosesu julgamentu ba Kiak sira lao PJR tenki esplika.
“PJR tenki justisa tanba saida maka kazu nee taka, sementara kazu nee julga hela iha tribunal,” dehan Oliveira.
Direitor nee hatutan katak, PJR labele foti razaun kazu nee segredu justisa, tanba justisa halao ba publiku, nee duni, tenki esplika.
“Justisa nee ba publiku, tanba prosesu hotu tenki nakloke justifika ba publiku hodi ema hotu labele kestiona keta iha mutivasaun seluk,”
Hatan presiza investigasaun ba lider Komando F- FDTL nebe fahe kilat ba Kiak sira, Direitor JSPM, Luis responde katka, se iha nesesidade bele investiga, maibe denki bazei ba deklrasaun legal husi arguido Kiak nian iha tribunal.
Parte seluk, Brigadeiru Jeneral F- FDTL, Lere Anan Timor informa katak, iha krize politika militar nee Komando F- FDTL distribu duni kilat ba veteranus F- FDTL atu ajuda F- FDTL hakalma situasaun siguransa, maibe laos distribui kilat atu halo violensia no krime.
“Komando fo kilat laos atu halo krimi, maibe atu ajuda hakalma situasaun siguransa,” dehan Brigadeiru Lere foin lalais nee.
Nia hatutan katak, ba kazu fahe kilat nee rasik iha tinan 2007 Major Jeneral Taur Matan Ruak no Bjiner Lere rasik ba fo ona sira nia deklrasaun iha PJR. .
*kontributor MTH i STL)!

sexta-feira, 5 de março de 2010

Delta nova no teste ida ba Instituisaun Estadu nian

Husi Rodolfo Rodrigues*

Iha Incidente loron 28.12.2009, iha Delta Nova, Dili, ne´e vitima klosan nain rua,ida mate no seluk kanek. Iha incidente ne´e koloka ba profisionalismo ba ita nia Policia Nacional Timor-Leste (PNTL) nian. Husi organizasaun politika no sociedade civil hotu-hotu litik ka kritika makas ba profisionalismo ita nia Policia nian.
Hanesan resposta ba incidente, Governu liu husi Ministeriu Defesa no Seguransa (MDS),hapara operasaun ba Patrulamentu rutin husi Task Force/PNTL.

Maibe ho hapara ba patrulamentu Task Force/PNTL nian, loke espasu fali ba konfrontus, ba konfrontus spontaneas ka orgainzada husi artes marciais. Bele hare no akompana situasaun iha Timor-Leste laran,li-liu iha Dili laran. Fulan Janeiru laran konfrontus grupus artes marciais iha Dili laran, tuda malu iha bairo hot-hotu. Maibe wainhira bolu UNPOL ba resolve,hare hela deit ka nonton. Ho pacifiku husi UNPOL, populasaun iha bai-bairos husu atu Task force/PNTL re-aktivu fali sira nia patrulamentu. Maibe PNTL lakohi tan sai vitimas ba situasaun hanesan kasu Delta Nova,bolu ba fó seguransa ka salva situasaun Maibe to´o fatin akontecimentu Policia maka sai fali vitimas,naran Policia nia naran maka foer. Enquantu UNPOL ba fó seguransa sira loke maka sira nia ahi kareta nian lakan maibe sira la atua hodi neutraliza no detensaun ba autores sira halao disturbius ba ordens publika.


Ajenda liur ho laran:

Husi liur:

UN/UNPOL ninia mandatu hotu liu husi Hand Over ba PNTL, tuir progama konaba Hand Over tenke konklui to´o fulan dezembru tinan 2010. Ita hotu hatene katak projektu UN iha Timor-Leste ninia implikasaun política, social no ekonomika.

Ajenda ne´ebe maka hakarak joga ho situasaun ne´ebe instabilidade iha Timor-Leste,interese ba Mina Rai iha tasi Timor. Oinsa maka halo situasaun sabraut,instabilidade permanente, hodi bele justifica katak Timor-Leste la iha estabilidade no viabilidade hodi dada kadoras Greater Sun Rise (GSR) mai Timor-Leste la bele.

Husi laran:

Aproveita hodi buka halo fraku estadu Timor-Leste ka grupus ne´ebe maka joga sira nia ajenda oinsa maka buka halo fraku Instituisaun Estado Timor-Leste. Ho objektivu oinsa maka kria instabilidade no hadau ka kaer ukun lalais. Atu kaer ukun ka hadau ukun lalais,oinsa maka destroe ka halo fraku tiha pontus fortes husi Governu AMP maka sektores Seguransa/defesa. Instituisaun estadu ne´ebe maka tenke tiru maka PNTL. Kasu Delta Nova, hatudu oinsa maka estraga imajen PNTL nian no hodi atinji ba pasu seluk maka kria instabilidade nasional. Se situasaun maka instabilidade nasional, bele fó hanesan argumentu ba Prezidente Republika hodi bele konvoka eleisaun anticipada.




Kronolojia akontecimentu:

Vitimas hetan tiru molok Patrula Task Force/PNTL to´o iha lokal akontecimentu. Tuir Testamuna okular(lakodi dehan ninia identidade) haktuir katak molok Patrula Task Force/PNTL to´o nia hamrik iha odamatan, dehan katak,”Policia to´o iha odamatan Delta Nova tiru ba leten,fo sinal”. Tenik tan testamuna,”vitimas sira hetan tiru iha uma laran molok Policia to´o lokal (idem)”. Iha testemuna balu fali dehan katak,”autor tiru mos tuir festa,hatais civil maibe lori pistola”. Hare husi kronolia ba akontecimentu katak autor krimi ba ho ninia intensaun klaru no target mos klaru.

Maibe probaganda ne´ebe maka lao no orientasaun maka oinsa maka desakredita Policia ho lia fuan oi-oin,Policia kriminal,policia la profisional,no sst. Probaganda monta liu husi meius hotu-hotu, facebook,internet,blogues,sst. Objektivu no tendencia klaru. Mosu kronika lor-loron iha Timor Post,quase fulan rua nia laran hodi kestiona konaba Profisionalismo PNTL nian hodi liga ho Incidente Delta Nova (28.02.2010). Iha mos deputadu balun halo probaganda iha Facebook hanesan, hodi kestiona konaba profisionalismu PNTL nian. Probaganda sira organizada,hare kronika ida iha Timor Post quase lor-loron,husi Janeiru to´o semana ba dala uluk fulan fevereiru kestiona konaba “kasu Guga no profisionalismu PNTL”. Imajina deit fulan ida ho kronika ida permanente,opiniaun publikua ne´e formado konaba imajens ne´ebe maka fan ho fakta ne´ebe mosu duvidas barak. Jornal hanesan Timor Post ne´ebe foin dadaun halo nia tinan ba dala sanulu (10º) hatun kronika ho intensaun mos klaru desakreditar servisu PNTL nian no servi ka sai fali nuda orgaun probaganda ba partidus ka grupus interesse ninia lobi.




Ministerio Publiku (MP) la huso ba Tribunal distrital mandatu kaptura,tamba saida?

Tuir investigasaun kriminal ne´ebe Policia investigasaun kriminal maka halao no hatama ona ba iha PJR hodi emiti mandatu ba kaptura autor krimi ne´ebe tiru,laos tuir julgamentu popular katak “elementu Task Force/PNTL” maka tiru,Maibe investigasaun kriminal hatudu katak autor krimi molok Policia to´o fatin akontecimentu krimi,iha ona laran festa Delta Nova. Tuir procedimentu legal, Policia Investigasaun kriminal (PIK) halo ona sira nia knar no hatou ona ba MP no huso ba Tribunal Distrital Dili hodi hasae mandatu kaptura ba autor krimi. Se Tribunal Distrital Dili maka hasae duni mandatu ba kaptura ba autor krimi Delta Nova,ita mos buka akompana,kasu ne´e monu iha juiz(a) ne´ebe nia liman. Se monu iha Juizas Jacinta ho Natercia,ita mos tenke buka akompana nafatin,tamba sempre iha beneficiu duvidas ba sira nain rua(2), tamba tuir observsaun ba kasus sira ne´ebe maka Juizas nain 2 kaer,liliu kasus sira ne´ebe maka iha ligasaun ba autor politika ka jogos politika,se sira maka hadau ba kaer ka lidera sempre iha motivu ka beneficiu ba duvida. Neduni husi Departementu Juridiku NGO Tur Hamutuk,durante akompana situasaun iha Tribunal Distrital Dili katak juizas balun rona fali konseilu husi sira nia konseleirus hanesan jurista hanesan Mari Alkatiri.



*CEFE Departementu Juridikuk NGO Tur Hamutuk!

quinta-feira, 4 de março de 2010

Komentario badak konaba "Mari Alkatiri no Operasaun Ninjas"

http://forum-haksesuk.blogspot.com/2010/02/mari-alkatiri-no-operasaun-ninjas.html

FORUM-HAKSESUK, segunda-feira, 8 de Fevereiro de 2010

Komentario badak konaba "Mari Alkatiri no Operasaun Ninjas"
Husi RUI COSTA*

Mari Alkatiri iha ninia komentariu liu husi Facebook konaba operasaun Ninja iha distirtus Bobonaro no Kovalima. Tuir haktuir medias nasionais katak: "aktividade ne´ebe maka grupus Ninjas iha distritus ne´ebe refere provoka paniku iha komunidades iha distritu rua ne´e”. Estado liu instituisaun PNTL halao knar hodi neutraliza grupus Ninjas ne´ebe maka aktivu iha zonas ne´ebe refere.Husi Mari Alkatiri ninia komentariu iha Facebook nune´e: ”Operasaun prende Ninja interompe dalan barak ba festa no dansa. Iha Zumalae, Suai, Lolotoe, etc. Komandante sira halibur bibere sira balu dansa to´o tuku tolo dader nakukun. Maluk feto sira nain hira maka la sente ema bok halimar sira nia liman no sira nia kotuk laran? Karik buat sira ne´e hotu la'o tuir Regimento PN? Bele nune´e duni!? Abc (Facebook Mari Alkatiri, 02/02/2010)”.

Molok atu komenta konaba Mari Alkatiri ninia ironia no ciniku, liliu falta sentidu humor, liliu falta sesibilidade ba povo ne´ebe terus. Buka komenta frases husi Mari Alkatiri, letra ba letra ho ninia intensaun no siknifikadu.

Tuir Mari Alkatiri, ”Operasaun interompe dala barak hodi halo festa no dansa”. Ba Mari Alkatiri, hatudu katak ema ne´ebe lakon ona sentidu estado no falta sensibilidade ba povu ne´ebe maka enfrenta difikuldades, liliu susar ne´ebe maka hasoru tamba hahalok Ninja nian.

Tuir Mari Alkatiri, "Komandante sira bok feto nia liman no kotuk”, hatudu momos katak Mari Alkatiri ne´e ema ke iha «negative think», hanoin maka aát hela deit, saida maka nia hanoin iha nia ulun maka buat aát no ladiak deit. Maibe nia la hanoin no rekonece saida maka ema seluk halo diak. Hare netik husi sorin parte diak nian. Maibe nia hare deit maka ida aát nian. Iha ne´e mos hatudu katak Mari Alkatiri imajinasaun lao makas hodi imajina to´o buat sira hanesan ne´e, kaer liman no bok kotuk. Hatudu momos katak Mari Alkatiri wainhira dansa ho feto, ninia hanoin ba ida aát kedan nian maka kaer liman no bok kotuk ho intensaun aát maka ne´e. Koidadu Buibere sira, Camarada Maubere Alkatiri wainhira dansa ho imi nia imajinasaun ba kedan ida aát maka ne´e. Hahu ohin ba oin kuidadu ho Camarada Mari Alkatiri. Camarada Buibere sira, ne´e mestre maka hanesan ne´e ona, sa tan maka ninia alunus sira? Tuir Indonesia lian maka ne´e: «Guru kencing Berdiri, Murid Kencing Berlari».

Tuir Mari Alkatiri, "Dansa ninia ligasaun ho Regimentu PN”, hatun liu nivel Mari Alkatiri nian tamba ninia ciniku no kritika ligasaun Dansa ho regimentu PN. Tuir ema nia lian katak «kritika no ligasaun ne´ebe baixo nivel», hatun lolos deit Mari Alkatiri ninia figura nudar ex-titular ne´ebe hetan beneficiu husi estadu hanesan kareta Prado, seguransa, mina, buat seluk tan estadu maka fó hotu tan deit ex-titulares. Simu Pensaun vitalicia, lei imoral ne´ebe Mari Alkatiri halo hodi protege no fo beneficiu ba ninia an rasik, laos ba Povo Maubere ka Buibere nebe maka Mari Alkatiri sempre temi ho ibun mamar.

Tuir Mari Alkatiri, ninia komentariu iha Facebook hatudu momos katak ema ida ke, psikolojikamentu desnorteadu, atu ba los ne´ebe, atu halo los saida, oinsa maka nia lampiaskan ninia stress ne´ebe berat. Tamba meius licitus no ilicitus rekore hotu maibe la sucesu nafatin hodi hadau poder husi AMP.

Tuir Mari Alkatiri, ninia target hotu-hotu faila hotu ona, uluk AMP foin kaer knar Mari Alkatiri hananu muzika katak "AMP ukun fó to´o fulan nem deit", hasae ba tinan ida, ba tinan rua, ho planu katak tinan 2008/09 atu konkretiza elisaun antecpida, buka liu husi meius oi-oin, Marcha da Paz, hatun masa barak hodi hatudu ba Presidente Ramos Horta katak ”nia sei iha força maka'as, neduni diak konvoka ba eleisaun antecipada”. Aproveita atentadu ne´ebe hasoru Presidente Ramos Horta no PM Xanana Gusmao, bele boleia netik ba kevakument poder ne´ebe maka husik mamuk liu husi Movimentu 11/02/2008. Tenta fali liu husi meius konstitucionais oinsa maka denuncia konstante lalaok Governu AMP nian hodi foti isus sira hanesan Korupsaun iha Governu AMP laran. Ho objektivu halo fraku no instituisaun estadu nian. Ema negarawan ka ema ne´ebe hola parte ba fundador Nasaun RDTL nian maka hananu ho lia fuan sentidu estadu maibe lalaok maka buka fali «infrakese» estadu rasik. La iha kedan sentidu estadu ho lalaok ne´e rasik.

Mari Alkatiri no Operasaun Ninja iha distrito Bobonaro ho Kovalima:

Tuir Celso de Oliveira, ninia hakerek konaba ”konspirasaun política iha 2010 (hare blogue celsodeoliveira, (27/01)”. Autor argumenta katak, ”Ida, mosu "spontanitas" – alias - ema ida ou grupu ida tamba laiha buat ida atu halo entaun naran-naran halo ninja. Ou, tamba “kenakalan remaja”, entaun grupos sira baku malun iha estrada laran ou bairro laran. Rua, mosu tamba "direkayasa" ou "dipolitisasi". Iha teoria ida ne’e, iha grupo balun hakarak kria instabilidadi iha Timor Leste, hodi hahu’u kria grupo ninja iha foho i provoka rungu-ranga iha Dili laran. Objektivu final maka halo governu fraku, halo polisia sira desorientadu, halo parlamentu nasional labele halao servisu i ikus obriga Presidenti da Republika konvoka eleisaun antesipada". Autor estabelece ligasaun husi aktividade Ninja ho konfrontu artes Marciais hanesan forma oinsa maka aksaun ne´ebe maka iha ninia objektivu ba polítika k aba kaer poder. Dala ruma Celso de Oliveira, iha momento nia hakerek ne´e, seidauk rona no le konaba saida maka Bankada Fretilin ninia deklarasaun politika iha Parlamentu Nasional iha terça-feira (02/02/2010) konaba kontra operasaun PNTL hasoru Ninja..

No la le'e konaba komentariu kiik ka badak Mari Alkatiri nian konaba operasuan Ninja rasik. Ho deklarasaun política husi bankada Parlamentar husi Fretilin no komenariu política husi lider Fretilin nian, sai hanesan Lalenok ba Hotu katak nakukun ne´ebe durante taka ema hotu nia matan bele iha netik naroman ruma hodi hatud malorek hela, saida maka Ninja, se se maka iha Ninja nia kotuk. Diak liu tuda fatuk subar liman, maibe tuda tiha fatuk hakilar fali katak hau maka tuda, ami maka tuda.Oinsa maka bele hadait to'ok Celso de Oliveira ninia hanoin ho Mari Alkatiri ninia komentariu iha Facebook konaba operasaun Ninja no misaun PNTL nudar ajente estadu ba protege cidadaun ne´ebe maka sofre tamba hetan teror husi grupus kriminosus organizadu. Tuir informasaun ne´ebe maka mass media iha Timor-Leste laran tomak hatou maka ne´e, grupos organizadu ne´ebe maka iha operasaun Ninja nia kotuk maka: grupu CP-RDTL no grupo Bua Malus. Se maka organiza grupus sira ne´e no se maka iha grupus sira ne´e nia kotuk? Mosu tan evidencia katak grupus bandidus sira hola cobranza ho partidu histórica nia emblema. Tansaida maka to´o oras ne´e partidu histórica sira ne´ebe ninia naran liga ba asaun violencia kontra populasaun sira iha distritus ne´ebe refere ba seidauk condena ka hatou netik komentariu. Se hanesan komentariu badak Mari Alkatiri nian ne´e atu defende fali kriminosu Ninjas.

Mari Alkatiri nudar Advogadu ba Grupus Ninjas

Ka Mari Alkatiri nudar jurista ba formasaun akademika ninia maka buka oinsa maka defende ninia kliente sira iha Tribunal popular contra estado ne´ebe demokratiku no lalaok hotu-hotu halao no banati tuir Konstituisaun RDTL. Konstituisaun ne´ebe Mari Alkatiri rasik maka hakerek. Iha ne´e ita komprende Mari Alkatiri nudar advogadus ba grupus Ninjas ne´ebe lansa teror kontra populasaun, neduni nia tenke defende ba ninia kliente sira ne´ebe halo operasaun teror kontra populasaun civil iha areas rurais. Maibe Mari Alkatiri lakohi defende ninia kliente grupus Ninjas iha Tribunal ne´ebe estado-demokratiku nian, maibe nia prefere halo julgamentu liu husi komentariu hodi defende ninia kliente sira..

Se koloka pozisuan Mari Alkatiri nudar advogadus ba grupus Ninjas ne´e normal tamba ninia profisaun duni. Maibe problema maka ne´e, Mari Alkatiri nudar lider husi partidu istorika ida no ex-PM iha I Governu Konstitucional la iha sensibilidade nudar ema moris ba ema moris seluk ne´ebe maka sofre tamba aktividade Ninja iha distritus Bobonaro no Maliana. Fakta ne´ebe media fo sai katak iha ema nain tolu (3) mate, mane katuas ida no feto rua. Fakta mos katak povu sira iha distritus rua ne´e tauk no fakta seluk katak iha duni Ninja tamba durante operasaun PNTL kaer hamutuk 22 membrus Ninjas.Lian ikus hanesan mos lian litik maka ne´e: Mari Alkatiri ne´e iha los ne´ebe, sadere no halerek hamutuk ho povo iha diak no susar ka iha Ninja sira nia kotuk? Se hatan ba ida uluk, se nia hamutuk ho povo nudar lider ida, defende povu iha tempo diak no mos tempo ne´ebe sira iha susar. Hatan ba ida seluk, hamutuk ho grupus terorista sira hodi lansa teror, tamba ne´e maka haruka Mari Alkatiri halo komentariu badak iha Facebook ne´ebe ninia mensajen maka defende fali maka Ninja no kontra operasaun PNTL!

*Direktur Exekutivu NGO Tur Hamutuk (TH),

artikel ne’e foti husi Tempo Semanal, Segunda (08/02/2010, hal.2 no 13)!

publicada por FORUM HAKSESUK @

0 Comentários:
Enviar um comentário
Subscrever Enviar comentários [Atom]