Rui Costa: Akusa Horta-Mari defende interesse Woodside/Australia nian

Apelu ba mobolizasaun populares defende interesse nasional
Dili, (Mth,11/05). Prezidente Republika,José Ramos Horta(JRH) no Eis-PM Mari Alkatiri, iha quinta kotuk (06/05) simu delegasaun husi kompanias Woodside (Australia) no konsorcium hanesan Osaka (Japaun), Shell (Nederland),Conocophilips (USA). Delegasuan ne’e atu mai loby ba nain ulun RDTL (Republika Demokratiku Timor-Leste) hodi apresenta opsaun harii LNG namlele iha tasi leten. Delegasaun ne’e hasoru malu deit ho eis-PM Mari Alkatiri no Prezidente Republika ne’ebe konvoka Konseilu estadu ba hasoru Woodside.

Tuir Diretur Exekutivu NGO Tur Hamutuk ba Mth katak,”husu ba Prezidente Republika nudar figura numeru um estadu Timor-Leste no eis-PM Mari Alkatiri,atu la bele defende fali interese Woodside ho Australia nian”. Tenik tan Rui Costa,”Prezidente Republika labele abusu ba poder ne’ebe nia iha, hodi konvoka Konseilu Estadu atu simu fali Woodside iha Palacio Prezidencial”.

Rui Costa mos husu ba Mari Alkatiri,atu husu ninia komitmentu ba kasu dada kadoras Greater Sun Rise (GSR) ba Australia ka mai Timor-Leste. Tuir hakerek Tempo Semanal (11/05) katak Mari Alkatiri wainhira kaer ukun nudar PM iha I Governu Konstitucional defende dada kadoras GSR ba Darwin/Australia. Tuir Tempo Semanal (TS) ne’ebe cita Mari Alkatiri ninia deklarasaun iha loron 26 fulan Outubru tinan 2002,defende Pipeline ba Darwin, katak,” Karik hau maka investidor ida hau defende pipeline mai Australia tamba razaun rua,nia epxlika.Ida maka merkadu gas nian iha,Australia sosa gas. O bele fo haris Timor tomak ho gas maibe la iha ema sosa. Ida tan maka tasi mai Australia ladun klean,maibe tasi ba Timor-Leste klean liu(TS,hal.19)”.
Ba Rui Costa,”Mari Alkatiri ninia hanoin ne’e hatudu katak ema ida hanoin ba nia an no laos hanoin ba interese povu maubere nian”. Sira uja deit partidu Fretilin nudar movimentu historiku ba defende interese sira nia grupus ba poder no monopoliu riku no soin Timor-Leste nian,defende Rui Costa.

Tuir informasaun ne’ebe maka Mth hetan iha Palacio Prezidencial,Aitarak Laran,Dili,katak,”Prezidente Republika iha quinta-feira (06/05) lakohi simu Sekretariu Estadu Rekursus Naturais (SERN) Alfredo Pires,tamba Horta hatene katak opsaun ne’ebe maka Governu Timor-Leste defende la viavel ba interese Australia nian”. Tamba ne’e maka SERN Alfredo Pires,”hein mos Prezidente lakohi simu,tamba Prezidente Horta hakarak liu simu delegasaun ne’ebe lidera husi Woodside nian,do ke simu representante husi Governu RDTL ne’ebe representa interese povu Timor-Leste nian”.

Prezidente Parlamento Nacional (PN),Fernando Lasama de Araujo,katak,”hau la ba tuir Konseilu Estadu ne’ebe konvoka husi Prezidente Republika tamba atu ba tur ho kompania Woodside (in JND,10/05,hal.1 i13)”. Tenik tan Lasama,”nudar Prezidente PN,iha direitu inerencia ba tur iha Konseilu estadu,la ba tuir tamba lakohi hatun nivel hanesan kompania Woodside(idem).

Hermenegildo Lopes alias Kupa,akusa Horta-Mari nudar papagaiu ba Woodside, haktuir Kupa ba TS,”Prezidente Ramos Horta no Mari Alkatiri labele defende interese Woodside nian ou porta voz (in TS,11/05,hal.18)”. Tenik tan Kupa,”hau triste hare ita nia Prezidente Jose Ramos Horta ho dr. Mari Alkatiri sai Woodside ninia Papagaiu(idem)”.

Mobilizasaun massa populares ba defende interese nasional

Husi NGO Tur Hamutuk,liu husi Diretur Exekutivu,Rui Costa,”apelu ba mobolizasaun populares defende interesse nasional”, liliu husu ba forsas populares sira atu halo plata forma asaun hodi mobilza massa populares ba defende interese nasional Timor-Leste nian. Haktuir tan Rui Costa,”identifika,sira ne’ebe maka defende interese Australia no Woodside hanesan inimigo ba povu Maubere”,dehan Rui Costa (Mth)!