Kadoras GSR mai TL,husu Timor oan hamutuk

Dili,(Mth,07/05/2010). Kadoras Greater Sun Rise (GSR) lori dada mai Timor-Leste,tamba ida ne'e maka direitu povu Maubere nian,haktuir lia hirak ne'e husi Direktur Exekutivu NGO Tur Hamutuk, Rui Costa,iha nia knar fatin ba Mth,huri seik (06/05),wainhira hola parte ba Demo iha Aeroporto hasoru Prezidente Woodside.

Tenik tan Rui Costa,"atu dada kadoras GSR mai Timor-Leste,husu atu Timor oan hotu tenke hamutuk,husi povu maubere/aileba to'o ba elites politikas sira",defende Rui Costa.
Hatutan tan,"laos ida-idak joga fali nia interese privadu no grupus hodi koalia lori povu nia interese".
Rui Costa mos, "husu ba Sr.Prezidente Republika,nudar orgaun estadu no.1 iha Timor-Leste,atu defende interesse nasional povu maubere/aileba nian,laos ba defende fali,posisaun Wooside nian".

Tuir informasaun ne'ebe Mth hetan katak,tuir ajenda Prezidente Ramos Horta huri seik,quinta-feira (06/05),tuku 11:45 halo surumutuk ho SERN (Sekretariu Estadu Rekursus Naturais)Sr.Alfredo Pires,atu update konaba posisaun Governo Timor-Leste nian atu dada kadoras mai Timor-Leste.Maibe husi Prezidente da Republika rasik maka husu atu kancela ba meeting ida ne'e. Tuir informasaun ne'ebe maka hetan husi sumber Palacio Prezidencial tamba Prezidente lakohi simu Sr.Alfredo Pires tamba posisaun Governu no PM Kay Rala Xanana Gusmao la muda no la simu opsaun ne'ebe apresenta husi Woodside atu harii deit LNG iha tasi leten.
Governu nia posisaun klaru,dada ona Bayu Undan ba Darwin,agora tenke dada kadoras GSR mai Timor-Leste.

Rui Costa mos apelu,"mobilizasaun massa populares ba suporta dada kadoras GSR mai Timor-Leste". Hatutan,"se Australia ho Woodside maka la respeitu Timor-Leste nia posisaun,husu atu mobolizasaun total,kontra Australia ho Woodside",dehan Rui Costa.

Rui Costa, Direktur Exekutivu NGO Tur Hamutuk,NGO ne'ebe mosu ho principius ba defende interesse nasional Timor-Leste nian,inkluindu Tasi Timor(Mth)!