DILI—Primeiru Ministru (PM), Kay Rala Xanana Gusmao promote atu sai moderador ba Diresaun Consellu Popular Defeza-Republika Demokratika Timor Leste (CPD-RDTL) no partidu Fretilin liu husi dialogu nebe sei realiza iha Dezembru tinan ne’e.
“Nee laos ho massa tomak, diresaun CPD-RDTL nian, tanba iha Novembru nia laran ami tama ona iha orsamentu, ne’eduni prinsipiu Dezenbru hau bele koalia ho Fretilin, iha tempu iha ne’ebe iha fatin ne’ebe ita hasoru malu, tanba ida ne’e kestaun Fretilin no ita hotu nian, tanba imi mai ho bandeira Fretilin, Fretilin mos mai husi Fretilin ida ne’e ita sente ladun diak karik ita bo’ot sira konkorda iha dezembru,” hatete PM Xanana hodi responde ejijensia CPD-RDTL, liu husi sira nia asaun pasifiku nebe halao iha Kampu Demokrasia, Dili, Sabadu (8/10).
Bainhira husi grupu ne’e konkorda, PM, Xanana sei kontaktu lider partidu Fretilin nian hanesan Prezidente partidu Fretilin, Francisco Guterres Lu-Olo, ho Sekretariu Jeral Partidu Fretilin, Mari Alkatiri atu termina loron hodi halo kona ba estatutu Fretilin Movomentu.
“Iha loron hirak liu hau kontaktu ona ho Sekretariu Jeral Partidu Fretilin, katak sira mos prontu atu halo dialogu. Ne’eduni hein deit ita atu termina data iha Dezembru nia laran,” hatete Xanana.
Iha oportunidade ida ne’e, lider husi diresaun grupu CPD-RDTL, Guga alias Maubere hatete mos katak, tuir manual politika Povu maka Fretilin, ne’eduni nia husu ba iha Partidu Fretilin rasik atu haree didiak kona ba manual politika Partidu nian, ho nia Idelojia ida ne’e maka CPD-RDTL lakohi.
“Ami prontu kualker tempu, atu halo dialogu ho Partidu Fretilin. Ami la konkorda Fretilin ne’e atu sai partidu, tanba naran Fretilin ne’e povu nian atu nune’e Fretilin bele halibur ema bele tama husi oin ka kotuk ho livre,” Guga haktuir.
Tuir nia hanoin katak, Fretilin kaer prinsipiu 1975, atu halibur ema hotu laos atu fahe ema hotu depois soran malu baku malu, ne’eduni nia husu ba Xanana atu buka meius oinsa atu bele tu’ur hamutuk entre Fretilin Movimentu ho Fretilin Partidu. Husi CPD-RDTL prontu kualker tempu.
Iha oportunidade ida ne’e, husi membru CPD-RDTL, Guntur informa mos katak, problema ne’ebe mosu iha Fretilin Movimentu ho Partidu Fretilin, ida ne’e problema internal, ne’eduni nia husu ba governu liu husi Maun Bo’ot Kay Rala Xanana Gusmao atu buka solusaun hodi responde ejijensia CPD-RDTL nia ne’ebe durante halo asaun pasifiku durante loron tolu nia laran iha Dili. car
STL, Segunda, 10 Outubru 2011
