Mari Alkatiri ninia kompromisu ho Australia

Dili. Tur Hamutuk Média (THM). Foin dadaun Ministru Australia ba asuntu Imigrasaun no Cidadania (MIC), Sr. Cris Brown mai halo visita relampadu iha Timor-Leste. Objektivu visita ida ne´e atu retoma fali negociasaun ho autoridade Timor-Leste nian,konaba proposta ne´ebe maka PM Australia nian, Sra. Julia Gillard ható ba Prezidente Repúblika, José Ramos Horta,wainhira halao vizita ba rai kangguru.

Vizita ne´ebe maka Sr. Cris Brown halao loron 2 iha Dili,ajenda ba surumutuk ho autoridade Nasaun Timor-Leste nian, hanesan Preizidente Republika,Prezidente Parlamentu Nasional no Governu.

Maibe Sr. Cris Brown MIC nian mos ba halo surumutuk ho Sekretariu Jeral Partidu Fretilin,iha sede CCF (Comite Central Fretilin). Tuir nota husi embaixada Australia katak “Sr. Cris Brown la iha ajenda atu hasoru malu ho Sr. Mari Alkatiri,maibe solicitasaun mai husi parte Mari Alkatiri rasik”.

Hatan ba surumutuk Mari Alkatiri ho sr. Cris Brown MIC ne´e, xefi Departementu Politika Externa NGO Tur Hamutuk, Nando Belo,katak: “Mari Alkatiri la konsisten no la firmi ona iha ninia posisaun,tamba nia rasik kritika makas Governu ne´ebe lidera husi PM Kay Rala Xanana Gusmão konaba konduz kasu ne´e rasik”.

Waainhira Partidu Trabalhista no Sra. Julia Gillard,forma governu no koloka nafatin interesse atu negocias ho Governu no Estadu Timor-Leste konaba posibilidade ba harii centru procesamentu ba refujiadus. Mari Alkatiri liu husi jaringan sosial Face Book (FB) kritika Governu AMP,tamba deit la hatudu posisaun ne´ebe forte no mamar ba Australia. Hakerek Mari Alkatiri iha FB nune, “Tanba sa Governu australiano atu "obriga"nafatin Timor-Leste atu simu no harii Sentru de Prosesamentu
Refugiados? Tanba sa Governu de faktu Timor-Leste nian seidauk halo
desizaun klaru ba assuntu ida ne'e? Ita hotu hatene katak Parlmentu Nasional aprova ona Rezolusaun rejeita proposta atu harii Sentru ida, September 14 at 7:26pm”.



Hatan ba posisaun Mari Alkatiri muda husi fulan ida ba fulan seluk muda,Nando Belo,xefi departementu Politika Externa NGO Tur Hamutuk katak, “Mari Alkatiri iha kompromisu ruma ho Australia,ne´eduni povu prociza hatene,sa kompromisu”,litik Nando Belo.

Tenik tan Nando Belo,”Mari Alkatiri ninia pozisaun muda,tamba deit nudar lider politika,oinsa maka buka aliadus tatika no hodi atinji ba ninia estratejia maka oinsa fila ba ukun iha 2012”,defende Xefi Departementu Politika Externa NGO Tur Hamutuk ba THM.

Hatutan Nando Belo, “Australia buka aproveita Mari Alkatiri,husi sorin ida. Husi sorin seluk, Mari Alkatiri mos buka aproveita Australia,tamba iha faktor komum maka bele halo hamutuk parte rua ne´e maka aliadus estratejika iha tempo badak to´o 2012”.

Explika tan Xefi Departementu Politik Externa NGO Tur Hamutuk,”aliadus estratejiku no konjunturais tamba husi parte Australia no Mari Alkatiri, identifika ona sira nia adversariu maka Governu AMP ne´ebe lidera husi PM Kay Rala Xanana Gusmão”,argumenta Nando Belo!